網紅的藏寶箱不要只是有夢呢首歌，夢想得嚟有啲現實，我覺得好啱當時嘅社會氣氛🙈❤️依家聽返，反而有另一種感覺。
話說，呢首歌係分咗手之後出嘅，依家睇返歌詞，第一句其實係有少少控訴對方，拍咗拖5年，永遠只係覺得我不足，而甚少肯定我嘅努力、實力，甚至乎覺得我用錯力，在意一啲唔應該在意嘅地方，令我質疑我自己係咪求好心切。喺一個好負面嘅環境下，我寫咗「真的太少，假的太多，你根本很清楚」呢啲好直接嘅發洩。當然，作為一個正能人，我副歌係好清晰咁話返俾大家知，不要只是有夢，要實踐得很英勇～原因並唔係我本身好正能量，而係明知身邊賤人太多，若然成日分神去面對、去防衛、去對抗，不如花多啲時間去愛惜自己，寧願孤芳自賞，也不隨波逐流。
當然啦，唔同人聽歌會有唔同嘅解讀，我成日回想自己寫嘅歌，愈正能量，背後受嘅傷愈多，我係用呢啲歌嚟療傷、安慰自己，鼓勵自己再繼續努力落去。我承認自己係好敏感，以前亦會好玻璃心，寫落歌入面係最直接而唔會傷害到其他人，而又好正能量咁鼓勵到自己鼓勵埋其他人嘅方法，最後，我內心回復返平靜，享受一次自我療傷嘅過程。所以依家聽返，真係好想大大力擁抱當年嘅自己，話俾佢聽，你已經做得好好，你嘅努力、才華我睇到曬！收到曬！你唔需要擔心、失落、害怕，哪怕以後啲人唔再聽你寫嘅歌，仲有我。
我永遠會係你最忠實嘅聽眾❤️駱胤鳴。
Search